Lunglei Zotlangah Ruang Chhar

March 16 zingkar khan Zotlang-ah ruang chhar a ni a. He ruang hi Lalrokima (48) S/o Darchuha (L) Zotlang a ni tih finfiah nghal a ni. Thudawn danin, Lalrokima hi mahni chauha awm niin, March 16 zing khan a chenna inah thisen hmuh a nih laiin, amah tak erawh a awm-na hriat a ni loh avangin mi thenkhat ngaih tha lo chuan  a in chhunga thisen far chu a hnu chhui-in, a chenna In atanga ft. 260 vela hla, bawlh-hlawh paihna bul kawr-ah ruang hi an chhar ta a ni.

Buannel

Rokima hi eng vanga thi nge a nih tih leh, engtik hunlaia thi nge a nih tih chanchin ziak lai hian hriat a la ni lova. Police hotute hnen atanga thudawn dan chuan Rokima nghawngah hian zaina hnuhma niawm tak a awm a, hei bakah hian a thin bul velah chemtea vihna hnu hma niawm tak hmuh a ni bawk a. A taksaa hliam awm dan atang leh, ama ina thisen kai chemte hmuh a nih avangin mi kut tuara thi ni ngeia ngaih a ni a. Lunglei Police station-ah pawh tualthah thubuai ziahluh a ni.

Police atanga thu dawn danin, Rokima hi thawhtanni velah kha chuan hmu an la awm a. Hei vang hian thawhtanni zan emaw, thawhlehni velah emaw, thah a nih an ring a. A ruang hi a chhiat tan tawh avangin thawhtanni zan vela thah a nih a rinawm zawk mah tiin, kan thudawnna chuan a sawi a ni.

Sawi tawh angin, Rokima hi amah chauha awm a nih avangin a thi tih pawh hi hriat a ni lawk lova. Thudawnnain a sawi dan chuan March 16 zing khan pa pakhat zing chhuak chuan kawng atangin au a, chhangtu an awm loh avangin a kalsan leh mai a. A haw lamah au lehin, hetah pawh hian chhangtu an la awm loh fo avangin ngaihthat lohna em em pawh nei chuang lovin Rokima in kawngkapui chu nam hawngin a lut a. Ngaihthat lohna nei lem lo a nih avang hian in chhunga thisen awm te pawh chu ran thisen ni turah ngaiin, mei a zuk zawh hnuah in hi a chhuahsan ve leh mai a. Hemi hnu hian Ro-kima in chhunga thisen a hmuh dan leh, amah tak erawh a hmuh loh thu hi midang bulah a sawi a. Heta tang hian mi thenkhat ngaih tha lo chuan a in hi va enfiahin, in chhunga thisen far atang chuan an chhui zui a. A kawm thlang kawrah a ruang hi an zuk hmu ta a ni.

Rokima ruang hi March 16 vek khan Lunglei Civil Hospital-ah post mortem a ni a. He thihna thleng chungchangah hian March 16 tlai thleng kha chuan rinhlelh man an neih awm hriat a la ni lo.

He tualthihna thleng chungchangah hian March 16 khan Lunglei Police PRO Vanlalliana SDPO chuan Zotlang khawtlang hruaitute leh mi tlawmngaiten Police an lo puihnaah lawm-thu a sawi a. Hetihrual hian misual hnu chhui-na tibahhlah thei tur ang zawnga inhnam-hnawih lo turin mitinte a ngen a. He thil thleng chhui tur hian Addl. SP Rex. Zarzoliana kaihhruaina hnuaiah team din a nih thu leh, hnu chhuitute chu theihtawpa lo tawiawm theuh turin a ngen a ni.

Source:: Buannel