Pathian nena lendun

Upa L.H. Rohmingliana, Evangelistic Team Speaker

Zaninah hian kei tehlul Revival Centenary kharna Programme-a Pathian Thuchah (tawi) sawi tura min ruat ve hi Pathian leh kan hotute chungah ka lawm hle a ni. Programme-ah thupui thlan a awm loh avangin Revival Committee-in thupui a hman mek ‘Pathian nena lendun’ (Mika 6:8) tih hi sawi turin ka inbuatsaih ve tawp mai a, tunlaia a ringtute tan pawh tul hlein ka hria. 

1.         Engvangin nge he thu hi Pathian mite hnenah puan a nih? :

Pathian mi Israelte khan Pathian biaknaa an tih thin pangngai inthawinate an hlan mup mup reng a, mahse a hlantute kha Pathian nen an lengdun si lova, thil chu an ti nasa a, a titute nun Lalpan a chang si lova, khawvelin a chang zawk tlat a ni. Pathian kiangah an awm peih si lova, an thinlung ngaihtuahna pawh khawvel thilin a khat si a ni. Chuvang chuan Pathianin ‘Thilpeka tlawn lungawi chi ka ni lo; Bawng no kum khat mi, Berampa sang emaw Hriak lui sing emaw hlan ngawt hi ka lawmna a ni lo, chung zawng zawng chu ka nei vek, ka ta a ni si. A hlantu nangmah ngei kha chan pumhlum che ka duh a, I lengdun teh ang’ a ti a ni. Keini ho pawh hi Pathian tan thil kan ti nasain tih tur tha thar pawh kan hre thei, thil lawmawm tak pawh a ni. Amaherawhchu kan nun Pathianin a chang si lova. Pathian lak atangin kan hla si a, lendun pui turin min ko thar leh ta a nih hi!

2.         Enge lendun awmzia chu? :

A chhanna chu ‘Pathian nen kal dun, engkim ti dun,’ tih a ni mai. Chu tak chu Pathian min siam chhan leh min chhandam chhan a ni. Keini hian Pathian tel lo programme kan siam fova, chu mai ni lovin kan thiltihnaah Pathian hi hnawksak kan ti leh tlat mai thin a nih hi! Ringtua inchhal Pathian bula awm peih lo, a aw ngaithla peih lo, a duh zawng tih peih lo leh tih pawh tum lo kan va tam em! Hla phuahtu chuan ‘Kan lengdun thin, kan inkawm thin, nun kawng zim takah hian,’ a lo ti a. Chu mai a ni lo Lalpa kianga awm hi a ngenin an ngen zawk a - ‘Lalpa, chak lo mah ila, nangma hnena awm zel hi, Aw Isu I phal lawm ni? Phal mai rawh,’ an ti lawm lawm zawk asin! Hawh u ‘Lalpa I tel lo chuan,’ ‘Nangmah nen zel aw,’ i ti ve ang u. 

3.         Kristian nun chu Pathian pawl nun a ni :

Pangpar chu leiah zung a kaih a, pawn lamah a lo par chhuak thin a, ringtu nun chu Pathian pawlin pawn lamah a nung chhuak thin. Mosia chuan Pathian a pawl a, chumi zar chu Israel mipui ten an zo. Tuihal ten in tur an hmu a, riltam ten ei tur an dawng bawk a, khang zawng zawngah khan Mosia Pathian nen an lendun zar mipuiten an zo a ni. Tunlai Kristian rawngbawltute hi Pathian nen kan len dun zar khawvelin zo ve rawh se. 

Tunge sual hneh thin? :

Josepha, Pathian nena lengdun reng khan tisa chakna sual a hneh. Engvangin nge hurna ah te, hleprukna sualah te leh Pathian duh loh zawnga kan inhman leh thin? Hnehtu Lalpa kianga kan awm loh vang a ni. Sual hneh kan duh chuan Pathian nen leng dun ang u. 

Tute nge Vanah a hruai? :

Elija, Pathian bula awm reng kha (I Lalte 17:1) ‘A bula ka awm thinna Lalpa,’ a ti thin a ni. Enoka, kum 300 Pathian kianga awm peihte kha (Gen. 5:22-24; Heb. 11:5). Keini zawng Pathian bulah kan awm peih lo em a ni. He leiah pawh Pathian bula awm peih lote hi vanah hruai kan ni lo palh ang e, i hlau ang u. 

Tute nge Pathianin a hman thin? :

Ama kianga awm peihte a hmang thin. Elisa rawngbawlna a hrei fang tuia ti tla chhar sak leh a nih khan thingtuai a hmang a, kha thingtuai kha thing tha bik (special) a ni lo. Mahse hman theihin a lo awm hnai a, Zawlnei khan a hmang mai a nih kha! Pathian pawh hian hman theih, a bula awm peihte a hmang mai thin a ni. Zei te, thiam te leh hriat tam te pawh a tha em em a, Pathianin a duh erawh chu hman theih, awm hnai peihte an ni. Mi fing pawh, mi mawl pawh hman theiha Lalpa nena leng dun peih apiangte a hmang mai thin a ni. A hman theih turin i hnai ang u. 

4.         Lendun puia min sawm hi khawngaihna a ni :

Mihringte chuan kan aia sual leh tawp deuhte chu an kianga awm kan peih lo fo. Khawvela mi ropui leh mi lian ten chenpui atan min sawm lo, Pathian erawh chuan keini misual leh tling lote hi a kiangah, a bula awma lendun puiah min iai ve reng reng lo. Hei tak hi ‘Pathian Khawngaihna’ chu a ni. Tin, Pathiana thiltha kan mamawh zawng zawngte hi ralkhat chan a ni lova, heng - pianthar, harhthar, ngaihdamna te hi ama hnena awm chilha chan vek a ni (Joh. 5:39, 40; Heb. 7:25). Khawngaihna dawng tura min sawmtu Pathian hnenah i awm reng ang u.

 

Source: Mizoram Synod