UN Secretary-General-ah Ban-a bawk

       United Nations: Nimin thawhleh ni khan UN General Assembly chuan UN Secretary-General atan tuna thawk mek South Korea mi Ban Ki-Moon-a chu thlan tlin leh a ni. Khawvel ram 192 in telkhawm kaihruai turin a term hnihna a thawk chhunzawm dawn ta a ni.

Amah hi kum 67 ni tawhin UN Secretary-General pariatna a ni bawk. UN Genreal Assembly chuan UN Security Council recomand-na zuiin Vote khai khin tur awm miah lovin a tling a ni. Tichuan, a term hnihna chu January 1, 2012 atang December 31, 2016 thleng a thawk chhunzawm dawn ta nih chu. Kar kal ta zirtawpni khan UN Security Council member 15 in closed-door meeting naah an vote a ni. Thlan a nih hma kar tam tak liam ta atang tawh khan amah ngei hian UN Secretary-General thawk tura candidate pe turin member tinte hnenah lehkha a thawn chhuak naa a khingpui tur candidate thehchhuak an awm lo a ni. 

A term khatna kha January 2007 atang a tan a ni a. Khawvel tan thil tha a thawk chhuak tam hle. Khawvel ram then khata harsatna thlengteah khan a thawk tha hlea, Kawl rama Nargis thlipui nuaite, Pakistan rama tui liante, Haiti ram khawpuia lirnghingte a ngaihsak tak meuh a ni. Chu mai bakah  Sudan, Somalia, the Democratic Republic of the Congo (DRC) leh Côte d'Ivoire (Ivory Coast) ramahte pawh remna a siampui a ni. Chu lo pawh thil dang tam takah amah avangin hmasawnna an hmu. Mi entawn tlak tak a ni.

Source: BNO News