KRISTMAS

Upa R.Rozika

BCM Electric Veng

Lunglei Kumin chu Krismas hlain kan inkhawm boruak a luah hma viau mai. Lal Isua piancham ‘Krismas’ chu kan hma lawkah a rawn inher chhuak leh dawn ta, Pathian zarah dam taka thleng tlang turah inngai ila, Krismas kan thleng leh tur hi Pathian malsawmna a ni a, lawmthu sawi mawlh mawlh tur kan ni. Krismas hun hi chu hun ropui ber a ni a, kan hmuah dan pawh a dang tlat zel mai. Khawvel pumpuiah kan hun nghahhlelh, Mizo tan phei chuan a aia hun ropui zawk kan neih miah loh, hun ropui bika kan ngaih a ni. Kan hla phuahtute’n a season nena inhmeh hla ropui tak tak an siam a. Thlasik vur daifim te, Sikni eng mawi te, Tlaizawng par leh pholeng par te, Kumsul vei te hi, Bethlehem bawng in tlawm leh ranthleng te, Berampute leh van angel zai mawi rite nen kan thinlungah nghet takin min suih zawmsak a, Krismas hi Mizo culture-ah hian nghet takin a bet tlat tawh a ni.



Tun hnaiah hian thil danglam tak a awm a, Krismas hla reng reng hi chu Pathian hla, Bethlehema naupiang fakna hla, ‘Gospel’ zinga chhiar theih vek nia a lan laiin, Krismas hla danglam deuh ‘Krismas nang nen’ tih hla a ri zing viau mai. Krismas behchhanin lengzem hla kan nei tam telh telh ang em le? Mizote hian Krismas hi kan lawm vek a, kan lawm danah erawh chuan Lal Isua tel lo pawhin, a boruak nawmna hrim hrimah hian tam tak chu kan lo kalral thei hle a ni tih a lang a ni. Hei hi chu Krismas lawm dan dik a ni thei hauh lovang.

Lal Isua hi piang ta lo se : Kohhran hi a awm lovang a, Biak in pawh a awm lovang, kan inkhawm ngai lovang a, Krismas pawh a awm lovang, Mizote tisa tak pawha hmasawnna min thlensaktu Chanchin
ha hi a awm lovang a, Mizote hi kan la mawl em em ang. Kan rama Missionary an lo kal hma hun han chhut kir ila, Mizoramah Bengali School paruk vel a awm tan tawh an ti a, A AW kan nei si lova, Bengali tawngin lehkha kan zir ang a, kan hnam nunzia kan hloh thui hle tawh ang. Kan sawi seng lovang. ‘Heng hi Isua zara ka ta’ tih hla phuahtu hian a hmu fuh a ni. Tuna kan dinhmun hi Lal Isua kan tana a lo pian vanga kan chan vek a ni.


Lal Isua a pian si loh chuan, pawi ber tur chu Hremhmuna kan kal vek tur hi a ni. Thlarau chhandamna min siamsaktu ber a pian si loh chuan, kan dinhmun tur hi rapthlak tak a ni. Pu Rokunga hlain, “Pialral ni engmawi a lo chhuak, Piallei thim a rawn chhun eng” a tih hian a sawifiah hle mai. Kan thinlung thim entu hi Lal Isua chauh a ni a, Pathian hmaa tlinna kan neih leh theihna chu Lal Isua chauh hi a ni. Mizoram thim rawn entu pawh Bethlehema naupiang bawk hi a ni. Min tlan turin bawng in tlawmah a lo piang a ni. Hei hi kan nun innghahna bul a ni a, kan nun hruai zeltu tur leh kan tawpna tur pawh a ni.

Krismas hmang theuh theuh hi kan inang lo thei hle mai. Hun dang zawng aia Krismas laia sual a pung nasa te hi, a nihdan tur nen a inhmeh lova, Pathian Fapa lo lan chhan ber chu diabola hnathawhte a tihboral theih nan a ni a, (I John 3:8b) Hlaphuahtuin Khualbuk vengtu a demna ang deuh va, Krismas laia sual kan inbawmtir lutuk hi chu Lal Isua lo pian chhan a ni lova, Krismas kan hman dan tur a ni hek lo.

Krismas kan hman dan tur chu – Kan thinlungah Krista Lalber sela, ‘Kan lawm a che lei leh van Lal ropui, theih tawpin i fak hla kan sa ang” tiin kan hunte Amah chawimawi nan hmang ila. Riangvaite leh retheite Lalpa a nih angin, thlarau lam leh tisa lama harsate lam hawiin, midangte tan malsawmna ni ve turin theihtawp i chhuah ang u.