Manipur Mission-a Field Secretary Rev. PC Lalbiaktluanga'n Synod Mission Board-a a report danin, September 22 zanlai pelh tawh khan Mayang Inphal Pastor Bial chhunga Uchiwa Kohhran Biak In chu tu tih hriat lohte'n an hal. He kohhranah hian member 101 awm in, an Biak In hi kum 1988-a sak a ni.
Uchiwa Kohhran Biak In a kang tih hi September 23 zing dar 3:30 velah a bul hnaia Kristian awmte'n an hria a, an hriat hian a kang thei tur zawng zawng chu a lo kang fai hman tawh. Biak In chhunga lectern, thutthlengte leh lehkhabute a kang a, sakramen dawhkan leh pulpit erawh a kang chhe lo hlauh. Biak In bang hi leia zut a nih avangin Biak In hi a pumin a kang chhe lo nia rin a ni.
Biak In haltute hi hriat an ni lo va, kohhran member-te chuan, sakhaw dang betuten Kristiante an huat leh dodal vanga an hal ni lovin, misual kuthnu a nih an ring hlawm a ni.
0 comments:
Post a Comment
Leave a message