Khawvel zawng zawngah kal ula

By - Rev. Dr. J.F. Jyrwa

Kum zabi 19-na atanga 20-na chhung khan he thu hi Ramthar rawngbawlna auhla lar ber a lo ni thin a. Historian lar tak, Kenneth Scoot Latourette-a chuan “Rawngbawlna Kum Zabi Ropui” (The Great Century Missions) tiin a sawi hial a ni. A nih leh engati nge tunlai hian kan hriat lar zawk mah loh tlat le?... Kum zabi 20-na laihawl vela khawthlang lam tih dan zulzuia mission hna kalpuina a lo chuai deuh tak atang khan he chang hi a lar nep tan a, Bible chang dangten an luahlan ta a ni. Entir nan, Chanchin Tha Luka ziaka ‘the Nazareth Manifesto’ te, “Nun Tam” nei tura Johana kohna te leh, “Pain kei mi tir ang bawkin,” tia tirhchhuahna lam te, Mosia zirtirna anga Sabbath chawlh te, Jubilee te leh, khawtlanga dikna zawlnei te hna thawh lam te hi an lo langsar ta a ni.

Tunhmaa “Kristian ram” leh ‘Ringlo mi te ram’ tia inthliarna te kha a lo nep takah hian, Kristian tam zawkin Isua thupek anga khawvel zawng zawnga Chanchin Tha hril chhuah hi hlen ni tawhin kan hria ni tur a ni. Khawvel chu kan la hneh hauh lo mai; mahse khawvel ram zawng zawng chu Chanchin Tha nen a eng lai ber emaw tal chu kan thleng vek tawh ngei e. Tun hma chuan missionary-te chuan Europe leh North America atangin Africa, Asia leh Pacific ramte kha lawnga fangin an tlawh a, Khawthlang atangin Khawchhakah, Hmar atangin Chhimah. Tunlaiah erawh chuan Europe-a Kristian ram lo ni tawh thin, huap zo ram lo ni ta kaihthawh leh hna a ni ber a, chu hna thawk tur chuan missionar-te chu khawvel ram hmun thuma thena hmun hnih zet atangin an chhuak chum chum a ni.

Council for World Mission chanchinbu Inside Out han keu ila, doctor, nurse, zirtirtu, social worker leh minister hna thawk tura Presbyterian Church of India member kal chhuakte chanchin chhiar tur a chuang chamchi a. Khawvel kil tin atanga missionary te tirh chhuah an nih mek lai hian, “Khawvel zawng zawngah kal ula” tih hi a a la tul reng em le? Tunhmaa kristianten an tin zawn “khawvel” kha ringlo mite an ni a. Chungho chu Kristian an lo nih tak-ah hian, ‘khawvel zawng zawng’ tih chu engtia sawifiah tur nge ni ta ang?

Mark 16:15 thua Isua thupek hi vawiin thlengin a la ding reng a. “Khawvel zawng zawngah kal ula, thil siam zawng zawng hnenah chuan Chanchin Tha hi hril rawh u,” tih hi kan la hlen chhuak lo a ni. Amaherawhchu, “khawvel” tih hrilhfiahna tlanglawn tak kal pelin, Isuan rawngbawlna hmun hrang hranga min tirhna awmzia hi kan zawn chhuah a tul a ni. “Kum Zabi Ropui Ramthar Rawngbawlna” hun lai chuan “Khawvel” tih hi ‘ringlo mite’ tia hriat thin a ni a. Tun hnaia thenkhatin “khawvel” an hrilhfiah danah erawh chuan hnamte (ethne ) emaw mipui hlawmte (Mathaia 28:19) tia sawi a ni a. Chutichuan, Lal Isua lo kal lehna thlir chungin an rawngbawlna hmalak danah pawh, hnam 2000 emaw vel ‘la pawh loh’ hlawm (khawvela hnam hlawm 6000 vel atangin) an bitum a (Mathaia 24:14).

He hrilhfiahna hi, Bible-in a sawi dan atang chuan a hmasa zawk aiin a pawmawm zawkin, rawngbawlna hmalakna atan pawh a taka tih theih ni zawkin a lang. Amaherawhchu, Lal Isuan a zirtirte thu a pek laia “thil siam zawng zawng / ktisis” tia a sawi hi a la phawk chhuak lo deuhvin ka hria. Rawngbawlna hian mimal emaw tute emaw bik chauh kha a kawk bing lo. Bible-in a sawina zawn atang chuan, Kristian mission / rawngbawlna chuan mihring pum (thlarau, rilru & taksa), mihring zawng zawng leh, thilsiam zawng zawng a huam tel a ni. Chutiang a nih avang chuan, “khawvela kal chhuah” chuan heng te hi a huam vek tur niin ka ngai a ni :

1. La thlen lohte hnenah: Tunlai rawngbawlna an sawiselna tlanglawn tak chu, chanchin tha-in a thlen tawhte lamah hma lak a ni a, tam tak hlamchhiah an ni thung a; Chanchin Tha hril (evangelism) chuan Kohhran mi ni lo ai chuan, Kohhran mi te a bitum zawk mah a ni. Biak In-a lawi ve ngai lo leh, lawi ngai miah lo tur te a hlamchhiah a. Isua hun lai khan, nawhchizuarte, chhiahkhawntute leh misualte kha Juda sakhua leh khawtlang-ah chhiar tel an ni ve ngai lo. Kan tunlai khawvelah pawh hian heng nawhchizuarte (Commercial Sex Workers), zungawlveite, hnuchhamte leh khawlai naupangte hi an awm. Kan rawngbawlna huang chhungah hengte hi an la tel si loh chuan, engtinnge khawvel dap chhuak tawha kan inchhal theih ang le?

KJP Assembly English Service, Police Bazar, Shillong-a kan neih dan tlangpui han sawi lawk ila; chutah chuan ka hna pangngai bakah Pastor mawhphurhna ka kawp tel a. Kan rawngbawlna hi REACH Shillong Ministries kan ti a, a remchan dan ang zela mi tlawmngai inpete hmanga kal mek a ni. Chunghote chuan naupang tla darh mai maiho zingah rawngbawlna an nei thin a. Shillong-a Police Bazar velah khuan chutiang naupang chu tam tak an awm a ni. Chung naupanghote chu Pathian thu te an hrilh a, kal sualna leh kawng hlauhawm laka chhanchhuah an tum a ni. Tun hnai mai khan REACH hian chung naupangho zing atanga kawtthlera tal mai mai bansan duh tawhte tan rescue home a buatsaih a, vantlang zinga tel ve turin kan buatsaih mek a ni. Kohhran hian hetiang mi tanpui ngaite lam hi a la hawi tawk lo hlein ka hria a ni. Shillong khawpuia kohhran rawngbawlna reng reng chu kohhrana awm nghet sate leh mi thaho, mi pangngai chinte tan a ni ber a. Chutih laia he REACH Ministry-in vantlang laka hlate hnen thleng tura hma a lo hruai ta hi lawmawm ka ti hle a ni.

2. Ram dang mi lo lutte ngaihsak rawh u: Hemi chungchang hi vawi tam tak ka sawi tawh thin. Ka rilru an luah em em a ni. Bangladesh lam atanga dan lova India hmarchhak lama lo lutte hi mihring khawsak dan phung pangngai pha mang lo, rethei leh harsa em emte an ni tlangpui a, henghote hi engtin nge kan tih ang? Khawpui leh industrial area leh lungalhthei laihchhuahna hmuna hetiang mi rethei bikte ka hmuh apiang hian, heng ram dang atanga kan khawtual mite rawn pawlhsawp tura lo lutte hi ka ngaihtuah chhuak ziah thin. Mahse hei hi ka inzawt thin- “Heng mi lo pem lutte harsatna hre tur leh, eng vanga an pianna ram ngei rawn chhuahsan nge an nih tih hriat tum hian hma kan la tawh em,” tih hi. Hemi ka sawi hian henghote hi India rama an lo kalin kan zinga mite angin kan lo pawm ve mai tur a ni ka tihna a ni lo va. Kan be pawp ang a, an nihna hriat kan tum tur a ni ka tihna a ni. Chanchin Tha nan an hnen kan thlen hma chuan Lal Isuan, “Khawvel zawng zawngah kal ula,” a tih hi kan la hlen lo tihna a ni ang.

3. I ram mite hnen ngeiah kal rawh: Kohhran kalphung sawiseltuten India rama kohhrante hi khawthlang lam tih dan ngaina, an nun dan entawn leh mahni ram chhung thil ngaihthah niin an puh fo thin. Hemi kawngah hian tan khawh hleih theih lohna lai kan nei ve thinin ka hria. A bik takin India Hmarchhak bikah hian kan Pathian biak dan kalphungte hi chutianga ngaih kawih theih chu a ni zual em ka ti. Welsh missionary-te zara Chanchin Tha dawng kan ni a, an chungah kan lawm a, kan chawisang bawk a. An tih dan entawna kan tlang mi hnam ziarang kalsanna thinlung kan pu a nih chuan inen chian kan mamawh ang. Khasi-Jaintia bikah hian hei hi ngaihtuah chian a ngai zualin ka hria. Hnam hnufual deuh atanga ringtu rawn nite hi hnam culture mila che tura dahin, tlema a sang deuhte hian hnam dang tih dan kan zuisan a, kan inthen deuh tlat niin ka hria. Kan hnam nunphung humhalh tur hian kan ram mite zingah ngei hian Chanchin Tha chu kan chetpui ve tur a ni.

4. Thilsiam zawng zawng hnenah kal ula: Kan chenna khawvel hi a chhe mek a, ramsa an chereu va, thing leh mau an mang zo va, kan nitin nun hi a chhe tual tual. Ram chu tihchhiatin a awm a, boruak pawh tihbawlhhlawh a ni a. Ram leilung hausakna pawh hman khawloh mek a ni. Heng zawng zawngte hi mihringte tih, Pathianin malsawmna min pek keimahni ngeiin kan tihchhiatte an ni. Hetiang hunah hian kohhran hi engmah ti lo leh sawi lovin a awm mai tur em ni ang? Ni lo vang. Pathian thupek vawngtu a nihna angin kohhran chuan engemaw chu a sawi ngei tur a ni. Kan chheh vel boruak tihchhiata awm mek chhan tur hian engemaw chu kan ti tur a ni. Thil siam chhuahna lam kan kalpui dan te hi a pawi khawih nep zawnga kaihhruai dan kawng kan dap a pawimawh a ni. Marka 16:15-ah chuan Isuan heng thilsiamte (ktisis emaw) awm dan humhalh tura mawhphurhna min pek thu kan hmu a ni. He hmuna rawngbawl hna thawh hi hna harsa tak a ni. Mahse he hmunah hian lei thar leh van thar din turin thuneihna pek kan ni a, chu chu kan hlen chhuak tur a ni.