LAL ISUA A LO KAL LEH DAWN - Rbt. C. Rodinga

"Galili rama mite u, engatinge van lam ena in din reng? He Isua in hnen ata vana hruai chhohva awm hi, vana a chho in hmu ang bawk hian amah ngei hi alo kal ang" Tirhkohte 1:11
Lal Isua vana hruai chhohva a awm veleh vantirhkoh pahnih te'n zirtirte leh midang te hnena an hrilh hi kristiante chuan kan ring nghet tlat a. Bible-a amah Lal Isua ngeiin a lo kal leh tur thu a sawina pawh vawi sawmhnih aia tam hmuh a ni. Thuthlung thar-ah ringawt pawh hian a lo kal lehna thu sawina hi vawi 200 zet chu a chuang bawk. Hei hian Lal Isua lo kal lehna tur hi a pawimawh hle tih min hriattir a ni. Kristian sakhaw do nasa ber tu Muslim ho lehkhabu thianghlim ber, an roh em em 'Quran' chapter 3:45 ah pawh Lal Isua hi khawvel atangin a nunchungin vanah hruai chhohin a awm a, khawvelah a lo kal leh ang a, mi thate rawn chhandam a, misualte hrem turin a lo kal leh dawn a ni tiin an pathian thuziak-ah an roh ve hle a ni. Khawvela sakhaw lian ber dawttu Islam pawhin a pawimawh hle tih an tarlang chiang khawp mai.

Lal Isua lo kal lehna chhan tur te chu he khawvel atanga a mite hruai turte, a kohhranho tifamkim tawh turte leh mi zawng zawng chunga rorelsak tur tein a ni. A lo kal lehna hun tur thu ah chuan chhinchhiahna chi hrang hrang Bible ah tarlan a nih angin a ni leh a hun tur chu tuma hriattheih a nilo. In ring renga awmin ngaihven reng tur a hrilh kan ni a. Englai pawhin lo kal thei reng a nih laiin Pathian zahngaihna leh khawngaihna lei mihringte chunga lantir anih avang chauhin, a chanchin tha la hre ve lo te tan hun hawn belh a la ni zawk a lo ni a. 'He ram chanchin tha hi hnam zawng zawng hriattirna turin khawvel zawng zawng hriattirna turin khawvel zawng zawngah hrilhin a awm ang; chumi zawhah chuan tawpna chu a lo thleng ang' (Matthaia 24:14) tih kan hmu a ni. Tunah hian khawvel hmun pilril leh hnam engemawzat-in he chanchin tha hi an la hriat loh avangin Missionary inpe belh zelin bible copy maktaduai tam tak chhut belh mek zel a ni bawk a. Buh seng tur tam tak a awm lai hian, indaih lohna pawh a tam em em niin a lang.

Pathian programme pawimawh berte zinga TAWPNA hun tur, kan khawvel leh a dinhmun - hun leh hmun tawp vekna, chatuan nun thar hun nuam intanna, ringtute tana nghahfak ber leh ropuiber tur hi eng hunah pawh lo thleng sela kan mangan lohna turin mitinte kan inbuatsaih hi a tul ber a. Hmuhtheih te aia hmuhtheihlohna te kan dah chungnun zawk a pawimawh reng dawn a ni a. Lal Isua lo kal lehna hunah hi chuan, kan khawvel hringnun-in a ken tel zawng zawngin - in leh lo, silh leh fen awhna, ei leh in, mit chakna, lei mawina tinreng, chhung leh khat, chi leh kuang, inthlakhleh biknaan chi te, khawtlang leh ram rorelna khawvela ropuina lem chi hrang hrangte hi a chaknate chawpin a bo tawh ang a, Lal Isua ropuina leh hmangaihna chuan min hip khawm vek dawn a. Mit khapkar lovah engtin nge kan awm tih pawh hre hman lovin tih danglamin kan awm anga, vanah hruai chhohin kan awm dawn a ni. 'Khawvelah hian hreawmin in awm thin, nimahsela thlamuang takin awm rawh u, keiin khawvel ka ngam ta' (John 16:33) titu khan 'ka pa vohbikte u, lo kal ula khawvel siam tantirh ata in tana ram buatsaih chu chang rawh u'(Matthaia 25:34) min la ti dawn a. Hetiang hun kan chan tur hun aia ropui leh hlimawm hi kan lei hringnun hian a tawng ngai lovang.
Chhandam fate hlim tawp lohna hun alo thlen rual rual hian Lal Isua hre duhlo leh tiduhdah thin tute, amah hawisan lui tlat tute erawh chu hlau leh khurin bihrukna an zawng ve thung ang. Mangang leh lungngai takin - ropui rapthlaka inthuam Lal isua chu an en ngam lovang. A tlai lu ta - tihsan an ni anga. Piantharna hun khar alo ni tawh anga. Pathian thu sawi leh inhrilhna ri hriattur reng reng a awm bawk tawh lovang. A khawharthlakin, a rapthlak dawn mang e! Kan dinhmun theuh bihchiang ila, he TAWPNA hun atana kan la thlamuang chiahlo anih chuan - Tun hi hun lawmawm, chhandamna chan theihna hun tha a la ni a, Lal Isua ringtuah kan inpuan ngam a va hun em!!

Lal Isua chhandamna chang tawhte chuan he khawvel kan hman zel lai hian - vanin nuam panin kan kal mek, Hlimna leh lawmna chang ngei turin, kan thlen hunin kan lawm em em ang, hlimin ram ropuiah - tih hla kan sak zel theih chuan TAWPNA hun pawh hlimna vawrtawp a la ni ngei ang.
"Lalpa'n Malsawm rawh se"

 

Thalai Eng