Haiti Ramah School Chim Neitu Man

  Nov 9, '08 Haiti ram Petionville khawpuiah Zirtawp ni khan school pakhat a chima a tlem berah mi 88 chuang ruang an haichhuak tawh. A school neitu hi tunah man a ni. College school chhawng thum a sangah hian school naupang kum 3 atang kum 20 mi thleng a za tel an kai. Zirlai an neia class chhunga an awm lai takin a chim hnan. College La Promesse neitu hi preacher Fortin Augustin a ni a, mithiam pawh ruai lovin ama hriatnain a sa. An sawi danin, tun hmain construction-ah a lo inhlawh thin tawha mi dang rawih ngai lovah a ruat a ni awm e. A chungah pawh hian chhawng dang zawm bel a tum.

 

      Pawl chi hrang hrangin an tanpui mek. An rama UN engineer leh sipai awm mekte pawn an puia, International Red Cross pawh an pui bawk a. USA leh France ram atang ten an pui bawk.

        Thawm khawngaih thlak awm tak tak hriat reng a ni. Nu pakhat pawn a fate pathum tun thleng engmah an chanchin a la hriat loh thu a sawi. Pakhat leh pawh pahnih chu a hmua a fa dang mipa pahnihte kiltin kiltang a zawn pawhin a la hmuh loh thu a sawi ve bawk. School awmna hi a chung zawk lema kan hmuh ang deuh khian tlang panga awm ve tho a ni.

Chhanchhuah hna thawh mek a ni a. Room khat an hai chuah phei chu an professor nen mi 21 an ni a, an vaiin an lo thi vek tawh. He schoolah hian hming inpe mi 700 vel an nih thu thuneituten an sawi. Mi 150 inhliam an awm. Thi lotea phawrh chhuah pawh an ei zauh zauh. Tunah hian mi engzat chiah nge thi tih sawi theih a la nih loh thu an president Preval-a'n a sawi. Haiti ram hi khawvela ram rethei berte zinga mi a ni a, kan hnung thlipuiah pawh khan mi 800 chuang laiin nunna an chan.

 

 

Source: AP