March 2, '09, Egypt rama puihna Conference an neihnaah Israel-in Hamas-ho an dona hmun, Gaza Strip thuam that leh nan pui turin Palestine ram hruaituin khawvela ram hruaitute a ngen. He conference-ah hian UN Secretary-General pawh tel vein ram 45 atang palai an kal khawm a ni. Hemi tanpuina turah hian an rin hmang chuan ram 80 atang leh khawvel huap pawl hrang hrang atangte US dollar maktaduai 5,200 vel hmuh theih an beisei a, tun maia an hriat theihah chuan 4,480 a ni. Puitu lamte pawn hemi avang hian Israel leh Palestine ram hnih inkara remna leh muanna kawngah hmasawnna a awm phah an beisei.
Zawhna pakhat awm chu he fun (puihna lo kal) hi tu ten nge dawng anga vawng ang tih hi a ni. Khawvel ram tam zawk tanpuitute chuan Gaza awptu, Islamic sipai Hamas-ho hnena hlan chu an remti lo phawta, conference-ah pawh hian Hamas hruaitute an ko bawk lo a ni. An la tih ngheh loh chu puihna lo thlengte a vah vel dan tur hi a ni.
Saudi Arabia, Qatar leh Kuwait telin Arab Gulf ramte atang puihna US dollar maktaduai 1,600 vel san chhuah an tum. Marawhchu, Palestine President hnenah leh Hamas hnenah pawh pe lovin, Gaza-ah hmun va siama anmahni ngeiin va thawh sak an tum. Saudi Arabia ram hian US dollar maktaduai 1,000 pe turin a ti a, hei hi a la tam ver a ni. Clinton-i rawn hum chhuah ve thung chu Gaza Strip-a humanitarian aid atan US dollar maktaduai 300 leh Palestine President Abbas puih nan US dollar maktaduai 600 a vaiin 900 a ni. European Commision peng Excutive Arm of the European Union chuan Palestine ram hruaitute hnenah kum 2009 chhungin US dollar maktaduai 554 puih nan pek an tuma, Gaza siam that nan an hman an beisei hle bawk.
UN Secretary-General Banki Moon-a'n Egypt rama an conference neihnaah chuan Gaza a han tlawha mipuite tawrhzia leh an khawngaihthlak awm zia a mit ngeia a han hmuh thu sawiin pui theuh turin khawvel ram hruaitute a ngen.
Israel-in kar thum chhung ngawt Hamas-ho a beihnaah khan Palestine mi 1300, a zatve vel chu civil mi leh Israel mi 13 an thi a ni. Palestine Prime Minister, Salam Fayyad sawi danin in 4,036 leh thil dang 11,514 a chhiaa, chung in leh thil dang siam that leh nan ringawtah US dollar maktaduai 501 vel a ngai a ni.
0 comments:
Post a Comment
Leave a message